H1N1 вирүсийн эсрэг “Дэлхийн зөн” байгууллага 500 мянган ам доллар зарцуулахаар болжээ
H1N1 вирүсийн эсрэг “Дэлхийн зөн” байгууллага 500 мянган ам доллар зарцуулахаар болжээ


Томуугийн А хүрээний /H1N1/ вирүсийн тархалтын эсрэг “Дэлхийн зөн” олон улсын байгууллага 500 мянган ам.долларын өртөг бүхий урьдчилан сэргийлэх төсөл хэрэгжүүлэх гэж байгаа гэнэ.



Тус байгууллагын Монгол дахь суурин төлөөлөгч Алекс Снэри өнөөдөр Монгол Улсын Шадар сайд М.Энхболдтой уулзахдаа ингэж хэлжээ.



Алекс Снэри хэлэхдээ “ “Дэлхийн зөн” байгууллага өнгөрсөн 7 хоногт судалгаа, үнэлгээ хийн төсөл хэрэгжүүлэхээр ийнхүү шийдвэрлэсэн. Үүний дагуу нийслэл хот болон орон нутагт “Өрхөөс өрхөд” гэсэн зарчмаар эмзэг бүлэг, жирэмсэн эхчүүд, сүрьеэ, уушигны өвчтэй хүмүүс, бага насны хүүхдэд илчлэг ихтэй хоол тэжээлийг Эрүүл мэндийн төвөөр дамжуулан олгох болсон.

Ойрын гурван сард гэхэд л 12 мянган хүүхэд хоол, тэжээлийн туслалцаа авах боломжтой. Мөн иргэдэд нүүрс, гар ариутгах шингэн, дулаан хувцас, гэрийн дулаалга, өрхийн эмнэлгүүдэд шаардлагатай байгаа наад захын материал өгөхөөр төлөвлөөд байна” гэлээ.



Томуугийн А хүрээний вирүсийн тархалт, хийж байгаа ажлын талаар Шадар сайд М.Энхболд товч танилцуулж вакцин худалдан авах боломжийг байгууллагынхаа шугамаар судлахыг хүссэнийг Дэлхийн зөн байгууллагын суурин төлөөлөгч Алекс Снэри хүлээн авчээ