Эрч хүчтэй, эрүүл чийрэг, идэвхтэй Ерөнхийлөгч нар өнөөдөр дэлхий дахиныг удирдаж байна. Өнөө цагийн хамгийн нэр алдартай улс төрч Барак Обама, Владимир Путин нарын хагас нүцгэн дүр төрхтэй гэрэл зургууд сүүлийн үед олны нүдэнд өртөх болсон билээ.
Манай улсын хойд хөршийн удирдагчдын хувьд Борис Ельциний үеэс эхлэн спортоор хичээллэх нь уламжлал болсон гэхэд болно. Тэрбээр чөлөөт цагаараа газрын теннис тоглодог байсан нь Оросын улс төрчдийг спортоор хичээллэхэд ихээхэн нөлөөлсөн гэдэг. Дэлхийн лидерүүдийн чансааг тэргүүлдэг Владимир Путин хүүхэд байхаасаа л спортод дуртай нэгэн. Төрийн тэргүүн болсон ч энэ зангаа гээлгүй, өөрийн дэмждэг хөл бөмбөгийн багийн тоглолтыг үзэж суухыг нь олонтаа харж болно. Түүний жүдо, уулын цанаар хичээллэдэг нь дэлхийн лидерүүдийн дунд “спорт” гэсэн тодотголтой цоо шинэ имижийг гаргаж ирсэн юм. Путин спортоос гадна загасчлах, байлдааны онгоц жолоодох зэрэг хоббитой болохыг нь папараццийнхан хэдийнэ дурандаа буулгасан. АНУ-ын түүхэн дэх хамгийн анхны өнгөт арьстан Ерөнхийлөгч Барак Обама үндэснийх нь спорт болсон н сагсан бөмбөг тоглох дуртай. Мөн ихэнх чөлөөт цагаа гольфийн талбай дээр өнгөрүүлдэг байна. Францын Ерөнхийлөгч Николя Саркози өнгөрсөн тавдугаар сард өглөөнийнхөө гүйлтийн үеэр зүрх нь хямарснаас эмнэлэгт хүргэгдэж байсныг санаж байгаа биз дээ. Тэрбээр гүйлтээс өөр төрлийн спортоор хичээллэдэггүй аж. ОХУ-ын Төрийн тэргүүн Дмитрий Медведев уулын спортоос гадна йогоор олон жил хичээллэж байгаа юм. Цөмийн асуудлаас болж дэлхий нийтэд багагүй шүүмжлэгдэж байгаа Ираны Ерөнхийлөгч Махмуд Ахмадинежад чөлөөт цагаа хөлбөмбөгийн “ногоон талбай”-д өнгөрүүлдэг байна. Гэхдээ түүний хамгийн дуртай спортын төрөл бол морин поло аж. Дэлхийн лидерүүдээс хамгийн “хэрүүлч”-ээр тодроод байгаа Венесуэлийн Төрийн тэргүүн Уго Чавес дунд сургуульд байхаасаа бейсболоор хичээллэж эхэлжээ. Тэр байтугай коллежийнхоо шигшээ багийн ахлагч байсан байна. Тэрбээр энэ спортоо одоог хүртэл орхиогүй хичээллэсээр байгаа юм. Монгол Улсын Ерөнхийлөгч Ц.Элбэгдоржийг бие багатай ч бэлчээр томтой эр гэх нь бий. Эрх чөлөөний орон болох АНУ-д боловсролынхоо түвшинг дээшлүүлсэн тэрбээр чамгүй мэргэн харваач болохоо өнгөрсөн жилийн Улсын их баяр наадмын үеэр монгол түмэндээ харуулсан. Түүгээр ч зогсохгүй цэргийн сургууль төгссөн болохоор биеийн тамирын ямар ч салбарт баргийн аавын хүүд мөчөөгөө өгдөггүй гэнэ
Subscribe to:
Post Comments (Atom)
No comments:
Post a Comment